Leta Zunze ubumwe z'Amerika yategetse ishami ry'Ambasade y'Ubushinwa ryakoreraga mu mujyi wa Houston muri Leta ya Texas gufunga.
Itangazo ryasohowe n'umuvugizi wa ministeri y'ububanyi n'amahanga y'Amerika Morgan Ortagus ryavuze ko iryo shami ryafunzwe mu rwego rwo kurengera umutungo bwite mu by'ubwenge w'Amerika n'amabanga yayo. Uyu muvugizi Ortagus yavuze ko Amerika itazihanganira ivogerwa ry'ubusugire bwayo n'iterabwoba ku baturage bayo, nk’uko itihanganiye ubusumbane mu by'ubucuruzi, iyibwa ry'utuzi n'indi migenzereze y'Ubushinwa idahwitse. Ibyo biro byahawe kugeza kuwa Gatanu ngo bibe byafunze.
Ku ruhande rwe, umuvugizi wa ministeri y'ububanyi n'amahanga y'Ubushinwa, Wang Wenbin, yabwiye abanyamakuru ko ubutegetsi bwa Perezida Donald Trump nibutisubiraho, Ubushinwa buri bubagerere mu kebo kamwe n'ako bwagerewemo. Wang Wenbin yavuze ko ifungwa ry'ibiro bya Houston ryiyongereye ku ihohoterwa ry'abadiplomate n'abakozi b'ambasade y'Ubushinwa n'iterabwoba ku banyeshuri b'Abashinwa biga muri Amerika. Yavuze ko uretse ibikoresho byabo byafatiriwe, hari n'abatawe muri yombi. Nyuma y'amasaha make iryo tegeko ritanzwe hagaragaye umwotsi mwinshi mu kirere cy'aho ibyo biro bikorera. Polisi ya Houston yavuze ko abakozi batwikaga amwe mu madosiye bitegura kugenda.
Umubano hagati y'Ubushinwa n'Amerika wakomeje kuzamba mu mezi make ashize kubera kutumvikana ku by'ubucuruzi n'ikoranabuhanga. Kuwa Kabiri, Abashinwa babiri barezwe gufatanya n'inzego z'umutekano z'icyo gihugu mu kwiba amabanga y'ibigo bibarirwa mu magana hirya no hino ku isi, birimo iby'Amerika bikora ubushakashatsi ku rukingo rwa Covid 19.