Muri Leta zunze ubumwe z'Amerika, abapolisi bane bashinjwa iyicwa ry'Umwirabura George Floyd bitabye umucamanza kuri uyu wa mbere mu mujyi wa Minneapolis, muri leta ya Minnesota, mu burengerazuba bwo hagati bw'igihugu. Bavuze ko batemera ibyaha baregwa.
Umwe muri bo, Umuzungu witwa Derek Chauvin, ashinjwa icyaha cy'ubuhotozi. Ni we watsikamiye Floyd n'ivi ku gakanu ku italiki ya 25 y'ukwa gatanu gushize hafi iminota icyenda, Floyd ari ku mapingu aryamiye inda, kugera anogotse.Bagenzi ba Chauvin batatu bashinjwa ubufatanyacyaha.
Chauvin n'undi umwe muri bagenzi be baburana bafunze. Abandi babiri baburana bari hanze by'agateganyo nyuma yo gutanga ingwate y'amadolari ibihumbi 750.
Bazongera kwitaba umucamanza ku italiki ya 11 y'ukwezi kwa cyenda gutaha.
Hagati aho, umucamanza yabwiye ababurana (umushinjacyaha n'ababuranira umuryango wa Floyd) ko urubanza rushobora kuzatangira mu mizi yarwo ku italiki ya munani y'ukwezi kwa gatatu k'umwaka utaha w'2021.
Yabihangirije ko bagomba guhagarika kuruvugaho mu itangazamakuru. Ati: "Urubanza rubera mu rukiko, ntirubera mu binyamakuru. Nimukomeza, nzarwumurira ahandi."
Abashinjwa Urupfu Rwa George Floyd Mu Rukiko
Abari abapolisi bane baregwa urupfu rwa George Floyd bitabye umucamanza