Muri Nijeriya bariko baribuka imyaka itandatu irangiye abarwanyi b’umuhari w’iterabwoba wa Boko Haram banyuruje abakobwa b’abanyeshure barenga 200 bari kw’ishure ryo mu gisagara ca Chibok. Gushika ubu 112 muri bo baracari mu minwe y’abo barwanyi. Perezida Muhammadu Buhari abandanya avuga ko ariko arakora uko ashoboye kugira abarekuze.
Ishirahamwe ryo muri Nijeriya ryishinze kuvugira abo bakobwa ryiswe “Bring Back our Girls”, BBOG mu mfunyafunyo y’Icongereza ryatanguye gusaba ko barekurwa kuva mu 2014.
Mu mpera z’indwi iheze, harabaye amasengesho adasanzwe no gushima mu gisagara ca Chibok bibuka iyo myaka irangiye banyurujwe. Perezida Muhammadu Buhari yashikirije ko ata bategetsi ba reta bavyitabiriye kubera ikiza ca Corona ariko yemera ko abo bakobwa batazokwibagirwa.