Abategetsi mw’ishami ry’umuryango w’abibumbye ryita ku buzima, OMS, bavuga ko abakozi batatu bishwe, kandi ko abandi benshi bakomerekeye mu gitero cyagabwe ku bigo by’abarwanya Ebola mu burasirazuba bwa Kongo.
OMS ivuga ko abo bakozi bahitanywe n’igitero, abarwanyi b’aba mai mai bagabye ku bigo by’ubuzima bya ONU kuri uyu wa kane i Biakato. Ni mu ntara ya Ituri aho abakozi bahanganye na Ebola baba. Umwe mu bantu bahatuye nawe yishwe. OMS isobanura ko igitero cyo mu mujyi wa Mangina mu ntara ya Ituri, cyasubijwe inyuma.
Mu butumwa ku rubuga rwa Twiter, umuyobozi mukuru wa OMS, Tedros Adhanom Ghebreyesus, yumvikanishije akababaro gatewe n’abatakaje ubuzima. Yavuze ko icyo batinyaga kibaye. Avuga ko bagiye gushyira ingufu mu kwita ku bakomeretse no gukora ku buryo, abakozi bari mu bindi bice batekana.
Abantu barenga 2100 barapfuye kuva icyorezo cya Ebola cyadutse hashize umwaka urenga, mu ntara ya Kivu ya ruguru n’iy’epfo hamwe no mu ntara ya ituri. Ni muburasirazuba bwa Repuburika ya Demokarasi ya Kongo.