Leta zunze ubumwe z’Amerika yakomanyirije General Salah Mohamed Salih, uzwi no ku izina rya Salah Gosh, wahoze ari umuyobozi mukuru wa NISS, urwego rushinzwe ubutasi muri Sudani.
Minisiteri y’ububanyi n’amahanga y’Amerika yatangaje ko General Salah Gosh n’umuryango we badashobora kubona uruhushya, viza, rwo kujya muri Amerika kuko, nk’uko bigaraga mu itangazo ryayo, “ifite amakuru afatika ko yagize uruhare runini mu bikorwa by’iyicarubozo igihe yategekaga NISS.”
General Salah Gosh afite imyaka 63 y’amavuko. Yasezeye ku buyobozi bwa NISS mu kwezi kwa kane gushize. Ubucamanza bwa Sudani bumurega uruhare mu iyicwa ry’abaturage bari mu myigaragambyo yatumye Perezida Omar al-Bashir ahirikwa ku butegetsi ku italiki ya 11 y’ukwezi kwa kane 2019.