Umuririmbyi w’ikirangirire akaba n’umudepite, Robert Kyangulanyi, uzwi nka Bobi Wine, wo muri Uganda yarekuwe uyu munsi kuwa kane. Byavuzwe n’umwunganira mu mategeko nyuma y’iminsi mike abamushyigikiye bavuze ko Wine unenga guverinema ku mugaragaro yafunzwe ku mpamvu za politiki.
Bobi Wine ufite imyaka 37 y’amavuko, umucamanza i Kampala yemeye ko arekurwa atanze ingwate. Yabwiye abayoboke be bari buzuye icyumba cy’urukiko ko yaguma muri gereza igihe cyose byaba bivuze “guharanira icyo yumva ari ukuri”.
Bobi Wine, yatawe muri yombi, ashinjwa gukoresha imyigaragambyo itemewe n’amategeko mu 2018. Ibyo birego bagenzi be b’abadepite bo mu mashyaka atavuga rumwe n’ubutegetsi bavuze ko ari ukwisekesha.
Abategetsi ba Uganda bakomeje kuburabuza Bobi Wine, ubonwa nk’ushobora guhangana na perezida wa Uganda Yoweri Museveni mu matora yo mu 2021.
Mu cyumweru gishize yabujijwe gukora igitaramo arafungwa. Asuman Basalirwa, umwunganira imbere y’amategeko, yabwiye ibiro ntaramakuru by’Abafaransa AFP, ko Bobi Wine azi ibyago bimwugarije umunsi ku wundi.
Guhiga abatavuga rumwe n’ubutegetsi ubutitsa, byatumye Leta zunze ubumwe z’Amerika mu cyumweru gishize, ihamagarira abayobozi ba Uganda, kwubaha ukwishyira ukizana kwabo muri demokarasi.