Muri Repubulika iharanira demokarasi ya Congo, abaturage barenga miliyoni ba Beni-Butembo na Yumbi nabo noneho batoye kuri iki cyumweru.
I Beni-Butembo, mu ntara ya Kivu ya ruguru, mu burasirazuba bw’igihugu, ntibari bashoboye gutora ku italiki ya 30 y’ukwa 12 gushize kubera icyorezo cya Ebola.
Naho i Yumbi, mu majyepfo y’uburengerazuba bwa Congo, ntibari bashoboye gutora mu kwa 12 kubera ubwicanyi bukomeye bwabaye hagati y’amoko y’aba-Banunu n’aba-Butende ku italiki 16 na 17 z’ukwezi kwa 12 bwahitanye abantu amagana.
Kuri iki cyumweru, i Beni-Butembo n’i Yumbi batoye abadepite n’abayobozi b’inzego z’ibanze gusa. Ntibatoye umukuru w’igihugu. Ntacyo byari bimaze kubera ko Urukiko rurengera itegeko nshinga rya Congo rwarangije kwemeza burundu ko Félix Tshisekedi yayatsinze. Tshisekedi yarahiye kuri 24 y’ukwa mbere gushize.
Abadepite 15 bose hamwe batorwa kuri iki cyumweru nabo ntacyo bahindura mu nteko ishinga amategeko nshya kuko amashyaka y’abayoboke ba perezida wa Repubulika wacyuye igihe, Joseph Kabila, bafitemo ubwiganze busesuye cyane.