Ijwi ry’Amerika ryamaganye icyemezo cyafashwe n’urwego rushinzwe kugenzura itangazamakuru mu Burundi cyo kongera igihe gihagarika mu gihe kitagenwe ibiganiro by’Ijwi ry’Amerika no guhagarika burundu ibiganiro bya radiyo BBC. Kuva ibi byemezo bigayitse byafatwa mu kwa gatanu 2018, Abarundi bavukijwe itangazamakuru ryigenga, ritabogamye.
Umuyobozi w’Ijwi ry’Amerika, Amanda Bennett ,yagize ati: "Twatunguwe n’uko abanyamakuru mu Burundi babujijwe kuvugana n’Ijwi ry’Amerika. Twemera ko uku gutera ubwoba abanyamakuru bacu bibangamiye ubwisanzure bw’itangazamakuru mu gihugu. Twifatanyije n’Abarundi kwamagana abababuza uburenganzira bwo kubona amakuru y’ukuri kandi yizewe.
Mbere y’uko Uburundi buhagarika kukumvikana kw’ibiganiro by’Ijwi ry’Amerika ku mirongo ya FM, byageraga ku bantu bakuru ku rugero rungana na 57% buri cyumweru. Ubushakashatsi bwigenga bwagaragaje ko abarenga 90% muri abo bemezaga ko bizera amakuru atangazwa n’Ijwi ry’Amerika.
Ijwi ry’Amerika rizakomeza ibiganiro mu Kirundi n’ikinyarwanda ryumvikana ku mirongo migufi ya Short Wave (SW), kuri Interneti no ku mirongo ya FM yo mu bihugu bituranye n’Uburundi.