Muri Leta zunze ubumwe z'Amerika, urubanza rw'umupolisi Derek Chauvin uregwa urupfu rw'Umwirabura George Floyd ruratangira kuri uyu wa mbere. George Floyd, wari ufite imyaka 46 y'amavuko, yapfuye ku italiki ya 25 y'ukwa gatanu mu mwaka ushize mu mujyi wa Minneapolis, muri leta ya Minnesota, mu majyaruguru y'uburengerazuba bwo hagati bw'igihugu.
Umupolisi w'Umuzungu witwa Derek Chauvin, w'imyaka 44 y'amavuko, yari yamucikamije ivi ku ijosi hafi iminota icyenda. Kandi yari yamuboheye amaboko mu mugongo n'amapingu, yamwubikishije inda hasi.
Floyd yapfuye yavuze inshuro zirenga 20, ati: "Nananiwe guhumeka." Urupfu rwe rwateje imyigaragambyo y'akataraboneka muri Leta zunze ubumwe z'Amerika ndetse no mu yindi mijyi myinshi ikomeye mu mahanga.
Uyu munsi, umucamanza, ubushinjacyaha, n'abavoka ba Chauvin baratangira gutoranya abaturage byibura 14 bagomba kuba urukiko rwa rubanda, Jury mu Cyongereza, ruzaca urubanza. Muri bo, 12 ni bo bazicara koko nk'urukiko. Abandi babiri bazaba ari abasimbura, haramutse hagize impamvu ibuza umwe muri aba 12 gukomeza urubanza.
Kubahitamo bizamara ibyumweru bitatu, buri munsi bidahagarara. Urubanza nyiririzina ruzinjira mu mizi yarwo ku italiki ya 29 y'uku kwezi. Abashinjacyaha bazahabwa ijambo bwa mbere.
Derek Chauvin aregwa icyaha cy'ubuhotozi atari yateguye. Araburana ari hanze nyuma yo gutanga ingwate y'amadolari miliyoni imwe mu kwezi kwa 10 gushize. Hagati aho, polisi y’umujyi wa Minneapolis yamwirukanye ku kazi. Icyaha kimuhamye ashobora gukatirwa kugera ku myaka 40 y'igifungo.
Umutekano wakajijwe cyane ku rukiko. Ingoro yarwo ikikijwe n'ibidandi bitatu by'isima bitandukanye, biriho insinga zityaye zimeze nk’amahwa.
Facebook Forum