Guverinoma y’u Rwanda irasaba abaturarwanda bose kutadohoka mu ngamba zo guhangana na covid-19, mu gihe hasigaye iminsi mike ngo urukingo rw’iyi ndwara rugezwe mu Rwanda.
Mu kiganiro cyahuje abayobozi banyuranye muri za ministeri ndetse n’umuvugizi wa Polise y’u Rwanda kuri iki cyumweru, izi nzego zagaragaje ko muri ibi bihe, mu Rwanda habayeho kudohoka gukomeje mu kwirinda icyorezo cya Covid-19, bituma abayandura barushaho kwiyongera.
Mu matangazo asohorwa na Ministeri y’ubuzima buri mugoroba, agaragaza ko imibare y’abandura ikomeje kuzamuka, aho buri mugoroba haboneka abantu 50, 40 kugeza ku ijana banduye iyi ndwara.
Mu kiganiro kuri Televiziyo y’igihugu, abayobozi batandukanye bashimangiye ko hakomeje kubaho ukwirara kudasanzwe mu kubahiriza ingamba zo kwirinda icyorezo cya COVID-19.
Minisitiri w’ubuzima, Dr Ngamije Daniel, yavuze ko hamaze kugaragara ko abantu batangiye kubona ko iki cyorezo kigiye kuneshwa, badohoka ku mabwiriza yo kwirinda nko kwambara udupfukamunwa no guhana intera.
Ministre w’ubuzima agasaba abantu kutirara muri ibi bihe igihugu gishobora kuzakira urukingo mu gihe cya vuba. Muri ibi byumweru bishize,inzego zinyuranye zari zitabiriye iki kiganiro, zagaragaje ko ari bwo bwa mbere mu Rwanda hagaragaye abantu benshi badohotse mu bikorwa byo guhangana na Covid-19. Umuvugizi wa polise y’u Rwanda Jean Bosco kabera, yumvikanishije ko hagiye gukazwa ingamba kugirango abadohotse babihanirwe.
Ministre w’ubuzima yatangaje ko usibye kudohoka kwagaragaye mu bantu benshi, muri ibi bihe hanaboneka ubwiyongere bw’iki cyorezo,ari nako kandi kirimo gutwara ubuzima bwa abatari bake. Abayobozi banyuranye bitabiriye iki kiganiro basabye abantu gukaza ingamba zo gukomeza guhangana n’iki cyorezo mu rwego rwo kwirinda gahunda yatuma igihugu gisubira muri gahunda ya guma mu rugo, yatumye ubukungu busubira inyuma Ministre w’ubucuruzi mu Rwanda Hakuziyaremye Suraya, yasabye abikorera kubishyiramo imbaraga.
Aba bayobozi bakuriye inzira ku murimo bamwe mu baturage bibwiraga ko Leta izadohora muri ibi bihe byegereje umunsi mukuru wa Noheri n’usoza umwaka. Imibare itangwa na Ministeri y’ubuzima igaragaza ko kugeza ubu abantu bangana 6528 bamaze kwandura iyi ndwara, naho ibihumbi 5892 bamaze kuyikira, mu gihe abakirwaye bangana na 580 naho abangana na 56 bamaze kwicwa nayo.
Inkuru y'umunyamakuru w'Ijwi ry'Amerika Assumpta Kaboyi
Facebook Forum