Muri Afrika y'Epfo, urubanza rw'uwahoze ari umukuru w'igihugu, Jacob Zuma rwasubitswe. Jacob Zuma ashinjwa ibyaha bya ruswa byo mu 1999 ubwo yari visi-perezida wa Repubulika. Areganwa na sosiyete ikora kandi igurisha intwaro yitwa Thales yo mu Bufaransa.
Jacob Zuma yari yicaye mu rukiko n'abayoboke be barimo Ace Magashule, uherutse guhagarikwa by'agateganyo ku mwanya w'umunyamabanga mukuru wa ANC, ishyaka riri ku butegetsi. Magashule akurikiranwaho ibyaha bya ruswa mu nkiko.
Ubushinjacyaha buvuga ko iyi sosiyete yahaye ruswa Zuma kugirango ayorohereze gutwara isoko ryo kugurisha mu gisilikali cy'Afrika y'Epfo intwaro z'agaciro k'amadolari miliyari ebyiri. Iyi ruswa, nk'uko ikirego kibyemeza, ingana n'amadolari ibihumbi 35 Zuma yagombaga gufata buri mwaka guhera mu 1999. Zuma na Thales barabihakana.
Uyu munsi, urubanza rwabo rwagombaga gutangira mu mizi yarwo, ariko umunyamategeko wunganira Jacob Zuma yahise abwira umucamanza ko yiyamye umushinjacyaha mukuru, amusaba kwikura mu rubanza. Byatumye umucamanza yimurira iburanisha ku italiki ya 26 y'uku kwezi, ni ukuvuga kuwa gatatu w'icyumeru gitaha. Impande zombi zivuga ko zizahamagaza abatangabuhamya bose hamwe barenga 200.
Jacob Zuma afite imyaka 79 y'amavuko. Yabaye visi-perezida w’Afurika y’Epfo kuva mu 1999 kugera ubwo Perezida Thabo Mbeki yamwirukanye mu 2005. Nyuma, Zuma yabaye umukuru w'igihugu imyaka icyenda kuva mu 2009 kugera yeguye mu 2018.
Facebook Forum