Muri Israeli, urubanza rwa minisitiri w'intebe, Benjamin Netanyahu, rwakomeje uyu munsi, mu gihe amashyaka ya politiki arimo ashaka uburyo bwo gushyiraho guverinoma nshya.
Netanyahu na ba avoka be bari bicaranye mu rukiko. Yahamaze umwanya yumva y’uko umushinjacyaha asoma ikirego, maze aza gusohoka, arigendera, mu gihe umucamanza yari atanze akaruhuko gato, nyuma y'ijambo ry'umushinjacyaha, na mbere y'uko atangira kumva abatangabuhamya.
Umushinjacyaha yabwiye urukiko ko Netanyahu yakoresheje umwanya we ukomeye wa minisitiri w'intebe mu buryo bunyuranyije n'amategeko, mu nyungu ze bwite zo kubona indonke. Netanyahu aregwa ibyaha bya ruswa. We arabihakana. Ni we minisitiri w'intebe wa Isirayeli wa mbere na mbere uburanishijwe akiri ku butegetsi.
Mu gihe Netanyahu yari mu rukiko, perezida wa Repubulika ya Isirayeli, Reuven Rivlin, yatangiye ibiganiro by'iminsi ibiri n'amashyaka ya politiki, kugira ngo amuhe amazina y'ushobora kuba minisitiri w'intebe mushya.
Nta shyaka na rimwe ryabonye amajwi y'ubwiganze busesuye mu matora aherutse ku italiki ya 23 y'ukwezi gushize. Likud rya Netanyahu riza imbere ariko rikeneye gufatanya byibura n'irindi rimwe kugirango ribigereho. Mu nama na Perezida Rivlin, Likud yamuhaye Benjamin Netanyahu.
Ibinyamakuru byo muri Isirayeli byatangaje ko Rivlin yaba yavuze ko atabona amashyaka ashobora kwishyira hamwe kugirango akore guverinoma nshya, bityo ko afite impungenge z'uko Isirayeli ishobora gusubira mu matora, yaba abaye aya gatanu mu gihe cy'imyaka ibiri yonyine gusa.
Facebook Forum