Mu Bubiligi, urukiko rwahamije icyaha cy'iterabwoba umudipolomate wa Irani witwa Assadolah Assadi, rumukatira gufungwa imyaka 20.
Assadollah Assadi, w'imyaka 49 y'amavuko, yahoze ari nimero ya gatatu mu bategetsi bo hejuru b'ambasade ya Irani i Vienne muri Otrishiya. Yafatiwe mu Budage mu kwezi kwa karindwi 2018 ari mu biruhuko, kuko ubudahangarwa bwe bw'umudipolomate butamurengeraga hanze y'igihugu cya Otrishiya. Ubudage bwamwohereje mu Bubiligi. Yaburanye afunze, ariko ahakana ibyaha ashinjwa.
Urubanza rwa Assadollah Assadi rwaburanishirijwe mu mujyi wa Anvers mu kwezi kwa 11 mu mwaka ushize. Kuva icyo gihe rwari mu mwiherero w'urukiko. Yakatiwe adahari. Yanze kwicara mu rukiko avuga ko rudafite ububasha bwo kumuburanisha kubera ubudahangarwa bwe bw'umudipolomate. Avoka we, Dimitri De Beco, yatangaje ko bazajuririra igihano cy'imyaka 20 y'igifungo urukiko rwakatiye Assadollah Assadi.
Assadollah Assadi aregwa ko yateguye igitero cy'iterabwoba cyaburijwemo ku rugaga rw'imitwe ya politiki itavuga rumwe n'ubutegetsi bwa Irani iri mu buhungiro, mu Gifaransa rwitwa "Conseil National de la Résistance Iranienne" (CNRI), rwari mu ikoraniro ngarukamwaka ryarwo ahitwa Villepinte, hafi ya Paris, umurwa mukuru w'Ubufaransa, mu kwezi kwa gatandatu mu 2018.
Iri koraniro ryahuje abantu bagera ku bihumbi 25. Ryarimo n'abatumirwa b'abanyapoliti b'Abafaransa, Abongereza, n'Abanyamerika, barimo Rudy Giuliani, avoka bwite w'uwari perezida wa Leta zunze ubumwe z'Amerika Donald Trump, n'Umurepubulikani Newt Gingrich, wigeze kuba perezida w'Umutwe w'Abadepite w'inteko ishinga amategeko y'Amerika.
Assadollah Assadi yaburanye mu rubanza rumwe n'abandi bantu batatu bakomoka muri Irani bafite ubwenegihugu bw'Ububiligi. Urukiko rwabahamije ubufatanyacyaha, rubakatira ibihano bya gereza bitandukanye, biri hagati y'imyaka 15 na 18.
Ni ubwa mbere umutegetsi ukomoka muri Irani aburanishijwe kandi ahanwe n'urukiko rwo mu Bulayi.
Facebook Forum