Ikompanyi y’indege y’u Rwanda, Rwandair yahagaritse ingendo zose yakoreraga mu gihugu cya Uganda kuva ejo tariki ya 10 z’uku kwezi "kugeza hafashwe ikindi cyemezo".
Itangazo ryasohowe na Rwandair, rinagaragara ku rubuga rwayo kuri Murandasi, rivuga ko iki cyemezo giturutse ku bwiyongere bw'abandura ikiza cya Covid-19 bakomeje kugaragara muri Uganda.
Uganda imaze kugira abanduye bose hamwe 56,949, ku buryo mu minsi ishize, Perezida Yoweri Museveni w'icyo gihugu yatangaje ifungwa ry’amashuri yose na za kaminuza mu gihe cy’iminsi 42, guhera ku wa taliki indwi z’uku kwezi kwa gatandatu.
Ku wa kane Emira Zunze Ubumwe z'Abarabu (UAE) zatangaje ko mu rwego rwo kwirinda iki cyorezo, abagenzi bava mu bihugu bya Uganda, Zambia na DR Congo guhera uyu munsi ku wa gatanu batemerewe kwinjira muri icyo gihugu.Izi ngendo zihagaritswe nyuma y’izijya Mumbai mu Buhinde, zahagaritswe ku italiki ya mbere y'ukwa gatanu uyu mwaka, nabwo kubera ukwiyongera kw'abandura COVID-19 muri kiriya gihugu.
Abifuzaga gukorera ingendo mu gihugu cya Uganda, bifashishaga ingendo z'indege, kuko kuva mu kwezi kwa kabiri umwaka wa 2019, ubutegetsi bw'u Rwanda bwafunze umupaka wakoreshwaga cyane wa Gatuna "bunagira inama" abaturage b'u Rwanda kutajya muri Uganda kuko abayobozi b’u Rwanda bakunze gushinja igihugu cya Uganda guhohotera abanyarwanda bariyo bamwe bafungwa abandi bicirwayo ariko Uganda ikabihakana.
Ku ruhande rw’u Rwanda, umubare w'abandura Covid-19 ku munsi na wo wongeye kuzamuka. Ubu bagera mu ijana ku munsi. Mbere yaho gato imibare yasaga n'iyagabanutse ndetse bamwe batangiye kwibwira ko Covid-19 igeze mu marembera.
Minisitiri w’Ubuzima, Dr Daniel Ngamije kuri uyu wa kane yasabye Abanyarwanda kwitwararika no gusubira kubahiriza ingamba zo kwirinda Covid-19, nyuma y’iminsi imibare y’abantu bashya bandura yiyongera.
Ministre Ngamije aganira na Televiziyo y’igihugu kuri uyu wa kane, yatangaje ko kudohoka ku mabwiriza biri mu bikomeje gutuma umubare w’abandura wiyongera.
Kugeza ubu, minisiteri y’ubuzima mu Rwanda itangaza ko kugeza ku mugoroba wo kuri uyu wa kane, abanduye Covid-19 bari bamaze kugera 27660 barimo 112 bayanduye kuri uyu wa kane naho abamaze gukira iyi ndwara bo ni 26341, mu gihe abakirwaye ari 953 barimo 9 barembye, mu gihe Covid-19 imaze guhitana abagera kuri 366.
Facebook Forum