Akarere ka gasabo kahaye abajyanama b’ubuzima bagakoreramo, ibikoresho bisuzuma umwuka uri mu maraso y’abarwariye Covid-19 mu ngo zabo. Abaganga bakurikirana abarwayi b'iyi ndwara bemeza ko abicwa n’iyi ndwara hafi ya bose bazira kubura umwuka, abari mu rugo bakaba batabashaga kumenya ko umwuka ugenda ugabanuka.
Abo mu tugali 73 tugize akarere ka gasabo mu mujyi wa Kigali ni bo bahawe utwo dukoresho tuzwi nka “Oximiter” tuzajya twifashishwa n’abajyanama b’ubuzima mu kubasha kumenya umwuka uri mu maraso y’abarwariye Covid-19 barwariye mu ngo zabo.
Ministeri y'ubuzima mu Rwanda ivuga ko iki gikoresho kiyongereye mu bindi bahamwe mbere, ubu bitwaza iyo bagiye kureba abarwayi ba Covid bagumye mu ngo zabo. Muri ibyo harimo ibibapima umuriro, imyambaro bambara ibakingira kuba bakwanduzwa n’abarwayi ndetse n’umuti wo gukaraba intoki.
Aba bajyanama b’ubuzima basobanuriwe uko bazajya bapima abarwayi. Umurwayi wa Coronavirus bamushyira Oximeter ku rutoki, ikagaragaza ikigero cy’ubushyuhe amaraso ye afite. Abaganga bavuga ko ubusanzwe umuntu muzima aba afite ubushyuhe bwa 95%, iyo Oximeter ibonye umuntu afite munsi ya 85%, aba arembye ku buryo ahita ajyanwa kwa muganga. "Oximeter" imwe igura hagati y’amafaranga y'u Rwanda 40,000 na 45,000.
Muganga Nkeshimana Menelas ushinzwe imivurire y’indwara ya Covid-19 mu Rwanda, yemeza ko iki gikoresho kizafasha kumenya uko abarwayi ba Covid-19 bari mu rugo bamerewe kugira ngo abarembye bihutire kujya kwa muganga. Avuga ko abenshi ari abakira batagombye kujya kwa muganga, ariko hari abajya barembera mu rugo babuze umwuka kandi bitari bizwi, akavuga ko kugira utu dukoresho tuzafasha abarwayi kuba batabarwa hakiri kare.
Umwe mu bajyanama b’ubuzima wa mbere wahawe ayo mahugurwa, bwana Wenceslas Rutagarama wo mu murenge wa Gisozi mu karere ka Gasabo, yemeza ko iki gikoresho kizagabanya umubare w’abarwayi ba Covid-19 baremberaga mu ngo zabo bakajyanwa kwa muganga batakibasha kubaramira.
Kugeza ubu imibare yaraye itangajwe na ministeri y’ubuzima, igaragaza ko mu Rwanda abanduye Covid-19 bamaze kugera ku 16, 811 barimo 190 banduye ku munsi w’ejo. Abamaze kuyikira barabarirwa muri 12,988 barimo 359 bakize ejo. Mu gihe abamaze guhitanwa na yo bagera kuri 226 barimo 3 bapfuye kuri uyu wa kabiri.
Ministeri y’ubuzima yatangiye kujya itanga urutonde rw'abarwayi ba Covid-19 barembye cyane. Ministeri y'ubuzima ivuga ko ibi bigamije kwereka abataremera iyi ndwara ko ikomeye kandi yica.
Facebook Forum