ONU iraburira ko igabanuka ry’inkingo zari zisanzwe zitangwa muri ibi bihe by’icyorezo cya COVID-19, rizagira ingaruka mbi zikomeye. Igipimo abana bahabwaho inkingo zibarinda indwara nk’iseru, tetanosi n’akaniga cyaragabanutse kuburyo buteye ubwoba muri ibi bihe by’icyorezo cya COVID-19.
Ibi birashyira miliyoni z’abana mu kaga. Ishami rya ONU ryita ku buzima (OMS) ryabivuze uyu munsi kuwa gatatu. Umuyobozi mukuru waryo, Tedros Adhanom Ghebreyesus, muri raporo ya OMS yakoranye na UNICEF, yavuze ko umubabaro n’impfu z’abana bitewe n’uko batahawe inkingo bagenewe, bishobora kurushaho kurenga kure COVID-19.
Bibiri bya kane by’ibihugu 82 byasubije mw’iperereza raporo yashingiyeho, byavuze ko gahunda zabyo z’ikingira zakomwe mu nkokora na virusi ya corona kuva mu kwezi kwa gatanu uyu mwaka. Ibibazo ahanini bishingiye ku kutagira ibikoresho bihagije byo kwirinda virusi ya corona ku bakozi bo mu buvuzi, kuba ingendo zibujijwe no kuba umubare w’abakozi bo mu buvuzi ari muto.
Ibyo byatumye serivisi z’inkingo zigabanywa izindi zirahagarikwa. Imibare ikubiye muri raporo ya 2019 yerekana ko hafi abana miliyoni 14 kw’isi hose batahawe inkingo zashoboraga kurengera ubuzima bwabo. Abenshi ni ababa ku mugabane w’Afurika bakunze kutabona n’izindi serivisi z’ubuvuzi. Iyo raporo ivuga ko ibikorwa by’ikingira bitagendaga neza mbere y’icyorezo gishya cya virusi ya corona, ariko ko aho kiziye cyabihuhuye.
Facebook Forum