Malawi: Urukiko rw'Ikirenga Rwakuyeho Igihano cy'Urupfu

Muri Malawi, Urukiko rw'Ikirenga rwakuyeho igihano cy'urupfu. Rwavuze ko runyuranyije n'itegeko nshinga.

Urukiko rwahereye ku rubanza rw'ubujurire rw'umuntu wakatiwe urwo gupfa. Rwaciye iteka ruvuga ko iki gihano kinyuranyije n'itegeko nshinga, bityo ruba rukuyeho igihano cy'urupfu. Rwategetse guverinoma gusubira gusuzuma dosiye z'abantu bose bafunze bakatiwe urwo gupfa.

Kwica abanyururu babaga barahamwe n'ibyaha biremereye, birimo ubuhotozi, kugambanira igihugu, cyangwa gufata abagore ku ngufu, byigeze gukorwa cyane muri Malawi. Ariko 20 ba nyuma bishwe mu 1992, nk'uko umuryango mpuzamahanga uharanira uburenganzira bwa muntu, Amnesty International ubivuga.

Amaze kugera ku butegetsi mu 1994, perezida wa mbere wa Malawi watowe muri demokarasi, Bakili Muluzi, yavuze mu ijambo rye ryo kwimikwa ko atemera igihano cy'urupfu. Yahise agabanyiriza igihano abanyururu 120 bari barakatiwe urwo gupfa, agihinduramo icyo gufungwa burundu.

Muri Afrika, Cap Vert ni yo yabaye iya mbere gukuraho igihano cy'urupfu mu 1981. Ubu gisigaye mu mategeko y'ibihugu byibura 30.