Inteko ishinga amategeko ya Libya irateranye guhera uyu munsi kugirango yige indi tariki amatora azabera. Abadepite ba Libiya bateraniye mu mujyi wa Tobruk, uri mu burasirazuba bw'igihugu. Bagomba gufata icyemezo ku cyifuzo cya Komisiyo y'amatora cyo gukoresha itora ry'umukuru w'igihugu ku itariki ya 24 y'ukwezi kwa mbere gutaha, n'ay'inteko ishinga amategeko nshya ku itariki ya 25 y'ukwa kabiri.
Aya matora yagombaga kuba yarabaye kuwa gatanu w'icyumeru gishize, ku itariki ya 24 y'uku kwezi kwa 12 turimo. Ariko Komisiyo y'amatora yarayasubitse kubera ibibazo bitandukanye. Birimo iby'abakandida. amategeko agenga amatora atavugwaho rumwe, imirwano hagati y'imitwe yitwaje intwaro inyuranye, no kuba igihugu cyaracitsemo ibice bibiri: uburengerazuba bugenzurwa na guverinoma y'i Tripoli yemewe n'Umuryango w'Abibumbye, n'uburasirazuba bugenzurwa na Mareshali Khalifa Hifter (ufite icyicaro gikuru mu mujyi wa Benghazi).
Kuba amatora yarasubitswe byateye impunge z'icyuho mu butegetsi. Bamwe mu badepite bavuga ko guverinoma y'agateganyo yarangije manda yayo kuwa gatanu ushize. Abandi bavuga ko manda igikomeza. Bimwe mu bihugu bikomeye nabyo ni ko bibibona.
Mu itangazo rusange rimwe bahuriyeho, Leta zunze ubumwe z'Amerika, Ubwongereza, Ubufaransa, Ubudage n'Ubutaliyani (bwahoze bukoloniza Libiya) batangaje ko "iyi guverinoma y'agateganyo ari yo izashyira ubutegetsi mu maboko y'izatorwa."
Inteko ishinga amategeko iteraniye i Tobruk igomba gufata umwanzuro wa nyuma no kuri iki kibazo. Guverinoma y'agateganyo ya Libiya yagiyeho mu kwezi kwa kabiri k'uyu mwaka turangiza.
Facebook Forum