Ubushinwa Bwafunguye Intara ya Hubei Yari Yafunze Kubera Corona

Leta y’Ubushinwa yafunguye intara Hubei yari imaze amezi abiri ifunze. Virusi ya Corona yaturutse mu murwa mukuru wayo Wuhan, umujyi utuwe n’abantu barenga miliyoni 11.

Nk’uko ibinyamakuru bibitangaza, ahantu hose abantu bategera imodoka ibinyabiziga, haba za “gari ya moshi” haba amabisi, hari uruvunganzoka. Imihanda yari yuzuye imodoka nyinshi. Abaturage bashakaga gusohoka muri Hubei nk’abashaka kuyihunga.

Leta y’Ubushinwa yafunguye Hubei yose guhera saa sita y’ijoro, usibye umujyi wa Wuhan wo ukiri mu kato kugera ku itariki ya 8 y’ukwezi kwa kane. Hubei, intara ituwe n’abantu miliyoni 50, ni yo yashegeshwe cyane mu Bushinwa na COVID-19 yahahitanye abarenga ibihumbi bitatu na 300.

Minisitiri w’intebe w’Ubushinwa, Li Keqiang, yihanangirije abategetsi b’inzego z’ibanze kutongera “guhishira” icyorezo nk’uko leta ibirega abayobozi b’intara ya Hubei.