Abayobozi b'ibihugu by'Umuryango w'Ubumwe bw'Ubulayi baraterana uyu munsi n'ejo amaso mu yandi bwa mbere na mbere kuva Covid yadutse. Kuva icyorezo cya Covid kimaze gukwirakwira isi, inama mpuzamahanga zarahagaze, ahubwo zikajya zibera ku ikoranabuhanga. Ni ko byagendekeye n'inama z'abakuru b'ibihugu, cyane cyane bo ko baba baherekejwe n'abantu benshi, barimo abadipolomate, abanyamabanga babo, abajyanama babo, abashinzwe umutekano wabo.
Iyi nama y'Abanyabulayi, ibera mu mujyi wa Porto, mu majyaruguru ya Portugal, ku nkengero z'inyanja y'Atlantika, nayo irakurikiza amabwiriza yo kwirinda Covid: abayirimo bose bagomba gupimwa, bakerekana ko batanduye, bagomba guhana intera hagati yabo, kandi bose bagomba kuba bambaye udupfukamunwa n'amazuru.
Covid n'ingaruka zayo ni cyo bigaho cyane, birimo igitekerezo Leta zunze ubumwe z'Amerika yatanze ejo kuwa kane cy'uko yitanguye gusangira n'ibindi bihugu ubuhanga bwayo bwo gukora inkingo.
Bwa mbere na mbere kandi mu mateka y'Umuryango w'Ubumwe bw'Ubulayi, ejo abakuru b'ibihugu bazakira umuyobozi w'ikindi gihugu cy'amahanga. Minisitiri w'intebe w'Ubuhinde, Narendra Modi, azaganira nabo ku ikoranabuhanga rya videwo. Yari yateganyije kujya i Porto ariko arabisibiza kubera ko igihugu cye gihanganye muri iyi minsi n'ubwiyongere bukabije bw'abandura n'abicwa na Covid, kikaba gikenye inkunga y'amahanga.
Abakuru b'ibihugu by'Ubulayi bariga kandi no ku bibazo cy'uburenganzira bw'imibereho myiza ku baturage babo muri iyi myaka icumi iri imbere: kongera umubare w'abafite akazi kugera kuri 78%, kuzamura umubare w'abakuze bagomba kwitoza akazi bihoraho kugera byibura kuri 60%, no kugabanya umubare w'abakene ku mugabane w'Ubulayi kugera kuri miliyoni 15, barimo abana miliyoni eshanu.
Facebook Forum