Perezida wa Kenya, Uhuru Kenyatta, yategetse ko amabendera yururutswa kugera hagati mu rwego rwo kwifatanya n'Uburundi mu kababaro k'urupfu rwa Perezida Pierre Nkurunziza.
Mu itangazo rye, Perezida Kenyatta arabwira abaturage b'Umuryango w'Afrika y'Uburasirazuba. Avuga ko amabendera ya Kenya n'amabendera ya EAC agomba kugezwa hagati kuva mu gitondo kugera nimugoroba, ku nyubakwa za leta zose, mu gihugu imbere, n'iz'ambasade za Kenya zose ku isi, kuri uyu wa gatandatu, taliki ya 13 y'ukwa gatandatu.
Asobanura ko ari "ukuzirikana ubuzima bwa nyakwigendera nyakubahwa Perezida Pierre Nkurunziza no kugaragaza icyubahiro gihambaye n'urukundo yari afitiwe n'abaturage b'Afrika y'Uburasirazuba, Afrika, n'isi yose, no kumushimira ibikorwa bye bikomeye byo guteze imbere EAC."
Perezida Kenyatta akomeza avuga kandi ko kururutsa amabendera kugera hagati ari ikimenyetso cyo "kwifatanya na bakuru bacu, barumuna bacu, na bashiki bacu bo muri Repubulika y'Uburundi."
Facebook Forum