<p>Kandida w'ishyaka ry'Abademokarate Joe Biden yarengeje amajwi amuha intsinzi yo kuyobora Leta zunze ubumwe z'Amerika nka Perezida wa 46. Ibyo byagaragaye Biden yegukana amajwi 20 yo muri Leta ya Pennsylvania na 6 yo muri Nevada zari zigihatanirwa kugeza mu masaha ya nyuma ya saa sita yo kuri uyu munsi wa gatandatu taliki 7 ukwezi kwa 11 umwaka wa 2020. Ubu yose hamwe, Biden afite amajwi 279 kuri 214 ya Donald Trump.</p>
<p>Joe Biden wahoze ari visi perezida w'Amerika, wabaye muri politiki ya Washington imyaka hafi 50, atsinze itora rya perezida wa Leta zunze ubumwe z’Amerika, yazarahira kw’italiki ya 20 y’ukwezi kwa mbere. Azaba abaye umuyobozi ukuze kurusha abandi mu myaka kugeza ubu Amerika igize. </p>
<p>Biden, umudemokrate wabaye muri Sena y’Amerika imyaka 36 akaba yaramaze imyaka umunani agwa mu ntege Perezida Barack Obama ubwo yari amubereye visi perezida, yari yakomeje kuvugwa n’ibinyamakuru bitandukanye ko yatsinze perezida uri ku butegetsi Donald Trump w’Umurepublikani mu bikorwa byo kwiyamamaza bitari byoroshye na nyuma y’uko amajwi atangiye kubarurwa.</p>
<p>Amajwi agikeneye kwemezwa ku mugaragaro, ashobora no kugezwa mu rukiko, biragaragara ko ashobora kuguma ari amwe. </p>
<p>Joe Biden ku mwanya wa Perezida yegukana amajwi byibura 270 kuri 538 ya Koliji y’Abatora. Intsinzi ya Biden, iratuma Trump aba perezida wa gatatu w’Amerika utsinzwe manda ya kabiri mu myaka mirongo ine ishize nyuma yo kuyobora manda imwe rukumbi. </p>
<p>Intsinzi ya Biden igezweho nyuma y’iminsi mike, umunsi nyirizina w’itora kuwa kabiri, leta zibarirwa muri mirongo, zibaruye amajwi ya miliyoni z’abatoye bakoresheje iposita bashaka kwirinda ibiro by’amatora kubera ubwoba bwo kuba bakwandura virusi ya corona. </p>
<p>Biden azaba afite imyaka 78 ku munsi wo kwimikwa nka perezida wa Leta zunze ubumwe z’Amerika nyuma yo kutabasha kubona umwanya wo guhagararira ishyaka ry’Abademokarate mu 1988 no mu 2008 ubwo yabuze abamushyigikira bahagije. </p>
<p>Ubu yazayobora Amerika, afatanyije na visi perezida bari kumwe mu bikorwa byo kwiyamamaza Senateri Kamala Harris wo muri Leta ya California. Ni umutegarugori wa mbere mu mateka y’Amerika mu myaka 244 uzaba abaye visi perezida wa Leta Zunze Ubumwe z’Amerika. Avuka ku Mujamaika n’Umuhindekazi. Ni nawe mugore w’umwirabura wa mbere wabonye itike muri politiki y’Amerika ku mwanya wa visi perezida. </p>
<p> </p>
Facebook Forum