Abanyapalestina barenga 300 bakomerekeye mu bushyamirane na polisi ya Isirayeli i Yeruzalemu. Isirayeli yijihije isabukuru y'imyaka 54 ishize yigaruriye igice cy'uburasirazuba cy'umujyi mutagatifu ku Bayahudi, Abayislamu n'Abakristu wa Yeruzalemu, mu ntambara y'iminsi itandatu n'ibihugu by'Abarabu mu 1967.
Abanyapalestina bateye amabuye abapolisi ba Israeli imbere y'umusigiti witwa Al-Aqsa. Abapolisi nabo babarashemo ibyuka biryana mu maso, na gerenade zigusha igihumura.
Umuryango "Croissant-Rouge" ya Palestina (ni nka Coix-Rouge) watangaje Abanyapalestina 305 bakomeretse. Yajyanye kwa muganga 228 muri bo. Abapolisi ba Isirayeli nabo bavuga ko 21 muri bo bakomeretse, barimo batatu bajyanywe ku bitaro.
Ubu bushyamirane bumaze iminsi hagati y'inzego z'umutekano za Isirayeli n'abaturage b'Abanyapalestina, biturutse ku cyemezo cya Isirayeli cyo kwirukana abaturage b'Abarabu mu gice kimwe cya Yeruzalemu y'uburasirazuba cyitwa Cheikh Jarrah.
Umujyanama wa perezida Joe Biden mu by'umutekano, Jake Sullivan, avuga ko Leta zunze ubumwe z'Amerika "biyihangayikishije cyane." Umunyamabanga mukuru w'Umuryango w'Abibumbye, Antonio Guterres, nawe ni uko. Umushumba wa kiliziya gatulika y'isi yose, Papa Fransisko, nawe aratakambira impande zombi, ati: "Nimuhagarike urugomo. Amahane ahamagara andi mahane gusa, ntashobora kuzana amahoro."
Facebook Forum