Uyu munsi, imyaka irindwi iruzuye neza abanyeshuli b'abakobwa b'i Chibok muri Nijeriya bashimuswe. Byibura ijana muri bo n'ubu ntibaraboneka. Ku italiki ya 14 y'ukwezi kwa kane 2014, abarwanyi bagera ku ijana ba Boko Haram, bishatse kuvuga ngo "imyigishirize y'Abazungu ni icyaha," bagabye igitero ku ishuli ry'abakobwa rya Chibok, muri leta ya Borno, mu majyaruguru ya Nijeriya, bashimuta abana 276 bari hagati y'imyaka 12 na 17.
Abenshi muri bo barabonetse, ariko abagera ku ijana na n'ubu nta rengero ryabo. Mu cyegeranyo watangaje uyu munsi, umuryango mpuzamahanga uharanira uburenganzira bwa muntu, Amnesty International uvuga ko guverinoma ya Nijeriya nta somo yakuye ku bushimusi bw'abanyeshuli b'i Chibok, kandi ko yananiwe kurengera abana n'amashuli.
Aha, Amnesty International yibutsa ko kuva mu kwezi kwa 12 gushize kugeza uyu munsi, amajyaruguru ya Nijeriya yabayemo ibitero byibura bitanu byo gushimuta abana ikivunge mu mashuli. Inkulikizi zabyo: ibigo by'amashuli 600 byarafunzwe mu majyaruguru ya Nijeriya. Ababyeyi bashyingira abana b'abakobwa bakiri bato kubera ko batakijya kwiga.
Mu rwego rw'igihugu cyose cya Nijeriya, Unicef (ikigega cy'Umuryango w'Abibumbye cyita ku bana) ivuga ko abana bari hagati y'imyaka itanu na 14 barenga miliyoni icumi batajya mu ishuli.
Facebook Forum