Muri Somaliya, uyu munsi kuwa gatatu al-Shabab yateye ikigo cy’ingabo za leta kiri ahitwa Awdheegle, muri kilometero 70 mu majyepfo y’umurwa mukuru Mogadiscio. Mu cyumweru gishize, ingabo za leta, zifatanije n’ingazo z’Afrika AMISOM, bari babohoje aka karere ka Awdheegle kari kamaze igihe mu maboko ya al-Shabab.
Mu gitero cy’uyu munsi, al-Sbabab yabanje guturitsa imodoka zitezemo ibisasu noneho nyuma batangira kurasa ku basilikali ba leta. Umugaba w’ingabo zirwanira ku butaka za Somalia, Général Yusuf Rageh, yabwiye itangazamakuru ko ingabo z’igihugu zabashije kubirukana batarinjira mu kigo neza. Yemeza ko nta musilikali wa leta yapfuye, ariko ko bake bakomeretse. Yavuze ko bishe aba-Shabab benshi bataramenya neza umubare.
Igitero cyahitanye umunyamakuru umwe w’Umusomali wakoranaga n’abasilikali ba leta yitwa Gacal Abdulle Gacal. Yari afite imyaka 23 y’amavuko, nk’uko urugaga rw’abanyamakuru ba Somalia rwabitangaje. Abaye umunyamakuru wa gatatu wiciwe muri Somalia muri uyu mwaka.
Abaturage ba hafi aho babwiye ikigo ntaramakuru Reuters cyo mu Bwongereza ko hari n’abasivili bahitanywe n’iyi mirwano. Al-Shabab yo iratangaza ko yishe abasilikali ba leta 50.
Facebook Forum