Ghana Yiteguye Gutanga Urukingo rwa Kabiri rwa Covid 19

Igihugu cya Ghana cyiteguye gutanga urukingo rwa kabiri rwa Covid 19 kibifashijwemo n'umugambi COVAX. Ghana yakiriye inkingo 350,000 za virusi ya corona za AstraZeneca uyu munsi kuwa gatanu zahageze zivuye muri Repuburika ya Demokarasi ya Congo aho zari zaroherejwe. Zizafasha mu cyiciro cya kabiri cy’inkingo nyuma y’uko iza mbere zamaze gushira nk’uko minisitiri w’ubuzima yabivuze.

Ghana, igihugu cyo mu burengerazuba bw’Afuruka kibaye icya mbere cyakiriye izo nkingo ziturutse mu mugambi rusange COVAX wo gusangira inkingo, watangijwe mu kwezi kwa kabiri, gahunda y’ikingira igatangira mu ntangiriro z’ukwa gatatu.

Aho iki gihugu gitandukaniye n’ibindi byagingimiranyije ku rukingo no ku bibazo by’amafaranga byatumye ibikorwa byo kuzigezayo bigenda buhoro, Ghana yatanze inkingo zirenga 900,000. Minisitiri w’ubuzima yavuze ko harimo inkingo 600,000 igihugu cyahawe binyuze muri COVAX, n’izindi cyabonye biciye mu bwumvikane hagati y’ibihugu.

Izo nkingo 350,000 igihugu cyakiriye uyu munsi, zibarwa muri miliyoni 1 n’ibihumbi 700 zari zagiye muri Repuburika ya demokarasi ya Congo. Congo byabaye ngombwa ko yohereza mu bindi bihugu, miliyoni 1 n'ibihumbi 300 z’izo nkingo, kubera ko itari buzabashe kuzitanga mbere y’uko zirenza igihe. Ni ukuvuga mbere y’impera z’ukwezi gutaha kwa gatandatu.