DRC: Vital Kamerhe Asabirwa Igihano cyo Gufungwa Imyaka 20

Umushinjacyaha mukuru wa Repubulika iharanira demokarasi ya Congo yasabiye Vital Kamerhe igihano cyo gufungwa imyaka 20.

Nk'uko perezida w'urukiko yabitangaje, urubanza rwa Vital Kamerhe ruzasomwa ku italiki ya 20 y'uku kwezi. Uru rubanza rubera mu kigo cya gereza nkuru ya Kinshasa, aho Kamerhe afungiye by'agateganyo kuva ku italiki 8 y'ukwa kane gushize. Abaturage benshi cyane baba barukurikira kuri televiziyo.

Vital Kamerhe, w'imyaka 61 y'amavuko, yigeze kuba perezida w'inteko ishinga amategeko. Yatawe muri yombi yari umukuru w'imilimo mu biro by'umukuru w'igihugu Felix Tshisekedi. Aregwa kunyereza imali ya leta ingana n'amadolari milioni 50. We yaburanye avuga ko ari umwere, ahubwo ko urubanza rwe ari urwa politiki.

Usibye igihano cyo gufungwa imyaka 20 y'imilimo y'uburetwa (travaux forces mu Gifaransa), umushinjacyaha mukuru yasabye urukiko ko rumutegeka kuyishyura yose, no guca iteka ko adashobora gutora no kwitoresha mu gihe cy'imyaka icumi.

Yasabye kandi urukiko gutegeka ko imitungo y'umugore wa Vital Kamerhe, umukobwa we, na mubyara we umwe, iri muri banki yose ifatirwa, ndetse n'inyubakwa zose za Vital Kamerhe zavuye mw'imali yanyereje.

Muri izi nyubakwa, nk'uko leta ya Congo ibivuga, harimo hoteli umuryango wa Kamerhe waguze mu Bufaransa, ifite agaciro k'amayero arenga miliyoni imwe. Uyavunje mu mafaranga y'Uburundi ararenga miliyari ebyiri na miliyoni 130. Naho mu manyarwanda, ararenga miliyari imwe na miliyoni 68.