Iyi mikino izatangira ku itariki ya 23 y'uku kwezi. Tokyo, umurwa mukuru w'Ubuyapani, watangiye kwakira abashyitsi ibihumbi. Ni ko n'umubare w'abandura Covid bagenda biyongera buri munsi. Bamwe mu bashyitsi nabo bashobora kuyijyanayo.
Ku itariki ya 19 y'ukwezi gushize, umwe mu bakinnyi ba Uganda basanze yaranduye bakigera ku kibuga cy'indege i Tokyo. Yahise ashyirwa mu kato, bagenzi be bandi umunani bo bakomeza urugendo muri bisi, bajya aho bagombaga gucumbika mu mujyi wa Osaka, mu burengerazuba bw'igihugu, muri kilometero 500 uvuye i Tokyo.
Hashize iminsi, basanze undi mukinnyi wa 2 wa Uganda nawe yaranduye. Inzego z'ubuvuzi zatangaje ko bombi uko ari babiri banduye virusi ya Corona yihinduye yitwa delta. Byatumye abategetsi barindwi b'umujyi wa Osaka n'abashoferi bose babegereye bishyira mu kato. Ikipe yose ya Uganda nayo yashyizwe mu kato muri hoteli icumbitsemo.
Kuwa gatandatu w'icyumweru gushize, abakinnyi bakomoka muri Serbia barapimwe basanga umwe muri bo yaranduye. Byateye ikipe ishyirwa mu kato. Icumbitse mu mujyi witwa Nanto, uri hagati no hagati mu Buyapani. Guverinoma yatangaje ko hari abandi banyamahanga bane bagiye mu mikino banduye barageze mu Buyapani.
Usibye imibare y'abandura ihora izamuka, abikingiza baracyari bake cyane. Ntibageze kuri 14%. Bityo, abaganga n'abashinzwe kurwanya indwara z'ibyorezo n'ubu baracyasaba guverinoma ko idakwiye kwemerera abaturage kujya kureba imikino.
Mu ngamba guverinoma y'Ubuyapani yafatiye hamwe na Komite Olempike Mpuzamahanga, bemeje ko ibirori byo gufungura imikino hazajyayo abategetsi bake gusa, aba Komite Olempike Mpuzamahanga, ab'Ubuyapani, ab'ibihugu bizaba byarohereje abakinnyi.
Imikino nimara gutangira, abaturage bake cyane ni bo bazemererwa kujya kuyireba. Nta na hamwe bazarenza ibihumbi icumi, nk'uko abategura imikino babitangaje. Ariko minisitiri w'intebe, Yoshihide Suga, yatangaje ko bibaye ngombwa imikino ishobora kuzaba nta muturage n'umwe wemerewe kujya kuyireba. (VOA/AP, AFP, Reuters).
Facebook Forum