Umuryango w'ubukungu w'ibihugu by'Afrika y'uburengerazuba-Cédéao wafatiye ibihano bamwe mu bayobozi b'igihugu cya Mali. Abakuru b'ibihugu bya Cédéao bakoze inama yihutirwa ejo muri Ghana. Bafashe icyemezo cyo guhana "abategetsi bose b'inzibacyuho ba Mali n'imiryango yabo. Kandi ibihano byahise bitangira gukurikizwa," nk'uko itangazo ryabo ribivuga.
Ibihano birimo kubabuza kwinjira mu bihugu bya Cédéao no gufatira imitungo yabo babifitemo. Bitewe n'uko abategetsi ba Mali bigijeyo amatora. Bandikiye perezida wa Cédéao, umukuru w'igihugu cya Ghana Nana Akufo-Addo, bamubwira ko atazaba ku itariki ya 27 y'ukwa kabiri 2022 nk'uko byari biteganyijwe.
Mu kwezi kwa cyenda gushize, abakuru b'ibihugu bya Cédéao bari babwiye abayobozi ba Mali ko bagomba kubahiriza ingengabihe y'amatora byanze bikunze. Mu kwa cumi gushize, abagize inteko y'Umuryango w'Abibumbye ishinzwe umutekano ku isi, bagiye muri Mali, nabo barabishimangira. Itangazo rya Cédéao rivuga ko umuryango uziga ibindi bihano mu nama yayo itaha mu kwezi kwa 12 niba leta ya Mali itisubiyeho.
Facebook Forum