Cadi: Batatu Baguye mu Myigaragambyo Isaba Ubutegetsi bwa Gisivili.

Muri Cadi, abantu batatu bapfiriye mu myigaragambyo isaba ko hajyaho ubutegetsi bwa gisivili.

Imyigaragambyo yahamagajwe na sosiyete sivili n'amashyaka ya politiki atavuga rumwe na leta. Yatangiye mu gitondo cya kare cyane. Yitabiriwe cyane cyane n'urubyiruko. I N'Djamena, hamwe na hamwe batwitse ibiziga by'imodoka bishaje. Abapolisi nabo bakoresheje ibyuka biryana mu maso.

Ubutegetsi bwari bwabujije iyi myigaragambyo. Imodoka nyinshi za gisirikari zazengurukaga mu mujyi wose.

Kugeza ubu, abantu batatu ni bo bazwi ko baguye muri iyi myigaragambyo. Barimo umusore w'imyaka 21 y'amavuko, yapfiriye mu myigaragambyo yo mu mujyi wa kabiri, Moundou, uri mu majyepho ya Cadi muri kilometero 400 uvuye i N'Djamena. Abandi bantu bagera kuri 30 bakomeretse hirya no hino mu gihugu.

Abaturage baramagana Ubufaransa bushyigikiye ubutegetsi bwa gisirikari. Bavuga kandi ko badashaka ubwami mu gihugu cyabo. Barasaba ko abasirikari bashyira ubutegetsi mu maboko y'abasiviri.

Perezida Idriss Deby amaze kwicwa mu cyumweru gishize n'umutwe w'inyeshyamba witwa FACT, umuhungu we, Général Mahamat Idriss Déby, yafashe ubutegetsi, ashyiraho inama ya gisirikari y'inzibacyuho, CMT mu magambo magufi y'Igifaransa, igizwe n'abandi basirikari b'abajenerali 14. Bavuga ko inzibacyuho izamara umwaka umwe n'igice, ariko ko bashobora kuyongerera igihe nk'iki inshuro imwe.

Iyi myigaragambyo ni iya mbere ibaye yo guhangana n'ubutegetsi bwa gisirikari bushya muri Cadi.