Bill Clinton Wabaye Perezida w'Amerika Ari mu Bitaro

Bill Clinton, wabaye perezida wa 42 wa Leta zunze ubumwe z'Amerika, yagiye mu bitaro kubera ubwandu bw'amaraso.

Kuwa kabiri ni bwo Bill Clinton yinjiye ibitaro bya kaminuza ya California, mu burengerazuba bwa Leta zunze ubumwe z'Amerika. Ariko byamenyekanye mu ijoro ryakeye, umuvugizi we, Angel Ureña, amaze gusohora itangazo ribivuga. Asobanura ko Clinton, w'imyaka 75 y'amavuko, yatangiye kwijajara. Abaganga be bavuga ko imiti bamuvuza irimo gukora neza.

Bill Clinton yategetse Leta zunze ubumwe z'Amerika manda ebyiri zikurikiranye, kuva ku italiki ya 20 y'ukwa mbere 1993 kugera ku ya 20 ukwa mbere 2001. Si ubwa mbere agize ibibazo by'ubuzima kuva avuye ku butegetsi. Mu 2004, abaganga bamubaze kubera ibibazo by'umutima. Mu 2005, yarongeye arabagwa noneho kubera ibibazo by'ibihaha. No mu 2010 yasubiye mu bitaro nabwo kubera ibibazo by'umutima.

Nyamara ntibyamubujije gukomeza gukora. Kenshi yagarutse mu ruhando rwa politiki gushyigikira abakandida bo mu ishyaka rye ry'Abademokarate, barimo umugore we Hillary Clinton na Perezida Barack Obama. Uretse ibyo, yakomeje no gukorera ikigo cye cy'ubugiraneza, cyitwa Fondation Clinton. N'ubu yagiye mu bitaro yari mu karere ka Los-Angeles mu rwego rw'ibikorwa by'iki kigo, nk'uko umuvugizi we yabitangaje.