Uyu munsi, abakuru b'ibihugu birindwi bikize cyane ku isi, G7, barakora inama yabo ya mbere perezida wa Leta zunze ubumwe z'Amerika, Joe Biden, aba arimo. Kurwanya virusi ya Corona ni kimwe mu bibazo biri ku murongo wa mbere w'ibyigwa.
Inama ya G7 igizwe n'abayobozi ba Leta zunze ubumwe z'Amerika, Canada, Ubwongereza, Ubutaliyani, Ubufaransa, Ubudage n'Ubuyapani, hiyongereyeho perezida w'inama y'abakuru b'ibihugu by'Umuryango w’Ubumwe bw’Ubulayi na perezida wa komisiyo yawo.
Inama yagombaga kuba yarateraniye muri Leta zunze ubumwe z'Amerika mu kwezi kwa kane k'umwaka ushize. Yarasubitswe kubera icyorezo cya virusi ya Corona. Iy'uyu munsi irabera ku buhanga bwa videwo. Ni yo ya mbere na mbere Perezida Joe Biden agiyemo nk'umukuru w'igihugu cya Leta zunze ubumwe z'Amerika, kimwe na minisitiri w'intebe mushya w'Ubutaliyani, Mario Draghi, umaze icyumweru mu milimo ye.
Nk'uko Maison Blanche, perezidanse y'Amerika, yabitangaje, Joe Biden aravuga ku mugaragaro ko guverinoma ye igiye gushyira amadolari miliyari enye muri Covax, gahunda ya OMS, Ishami ry'Umuryango w'Abibumbye ryita ku buzima, yo kugeza inkingo za Covid mu bihugu bikennye.
Umuryango w’ubumwe bw’ibihugu by’Ubulayi wo uratangaza ko uzashyira muri Covax amadolari arenga miliyari imwe na miliyoni 200, n'andi madolari arenga miliyoni 120 yo gutera inkunga ibikorwa byo gukingira abaturage b'Afrika virusi ya Corona. Uzayanyuza muri Africa CDC, ikigo cy'Afrika gishinzwe kugenzura no gukumira indwara.
Facebook Forum