Amerika Yemeje Ikoreshwa ry'Urukingo rwa Covid-19

Leta zunze ubumwe z'Amerika yaraye yemeje ikoreshwa ry'urukingo rwa Covid-19 rukorwa n'ikigo Pfizer Inc. Bitegenijwe ko mu minsi mike abantu bambere bazatangira gukingirwa. Kizaba ari igikorwa cy'ingenzi mu gihugu abantu bagera ku 295,000 bishwe n'iyo ndwara nkuko byemezwa na Ksaminuza ya Johns Hopkins

Ikigo cy'Amerika gishinzwe imiti n'ibiribwa cyatanze uburenganzira bwo gukoresha mu buryo bw'ingoboka uru rukingo rwakozwe n'ikigo BioNTech cyo mu budage.

Mu cyiciro cyarwo cya nyuma cy'igerageza, rwagaragaje ko rushobora kurinda iyo ndwara ku rugero rwa 95%. Biravugwa ko uru rukingo rushobora guhabwa abantu bagejeje ku myaka 16 kuzamura.

Abageze mu za bukuru babarirwa muri milliyoni 2.9 nibo bazabanza guhabwa izi nkingo muri uku kwezi.

Umuyobozi mukuru w'ikigo Pfizer, Ugur Sahin yavuze ko uru rukingo ruzafasha mu gukiza ubuzima bw'abantu benshi muri Amerika ruzihutisha ko ibintu byasubira mu buryo.

Inzego zishinzwe iby'ubuzima, abatwara ibintu n'abantu, amavuriro na za farumasi bamaze igihe bitegura gukora ubukangurambaga ku rwego rw'igihugu.

Ikigo Pfizer cyatangaje ko kigiye gutangira gukwirakwiza imiti hirya no hino ku buryo amavuriro muri za leta zigize igihugu ashobora gutangira gukingira kuva ku wa mbere.

Leta y'Amerika irateganya kwihutisha gahunda yo gukingira mu amezi ari imbere cyane cyane urukingo rwa kabiri rukorwa n'ikigo Moderna ni rumara kwemezwa.