Nijeriya yakiriye miliyoni enye z’inkingo za COVID-19 zo mu bwoko bwa Moderna, yahawe na guverinema ya Leta zunze ubumwe z’Amerika.
Minisitiri w’ubuzima wa Nijeriya yaraye abivuze mu gihe iki gihugu cyo mu burengerazuba bw’Afurika gihanganye n’inkubiri ya gatatu y’ubwandu bwa virusi ya corona.
Osagie Ehanire yavuze ko inkingo zahageze kandi ko zizashyikirizwa leta ubwo bizaba zimaze kwemezwa kugirango zikoreshwe.
Guverinema y’Amerika, mu cyumweru gishize yohereje inkingo hafi miliyoni 10, mu bihugu bibiri bituwe kurusha ibindi muri Afurika, aribyo Nijeriya n’Afurika y’epfo.
Minisitiri Ehanire yavuze ko, Nijeriya, ishobora kuzaba yakiriye miliyoni zirenga 40 z’inkingo, bitarenze impera z’uyu mwaka. Cyakora yirinze kugira ibindi bisobanuro atanga.
Mi minsi mike ishize, Nijeriya yabonetsemo ubwoko bwa virusi ya corona, Delta, bwandura cyane, minisitiri w’ubuzima yaburiye ko igihugu kirimo guhura n’inkundura ya gatatu y’ubwandu.
Mu gihugu, ubwandu bwariyongereye guhera hagati mu kwezi kwa karindwi. Handuye abantu babarirwa mu 174,325, hapfa 2,149 kuva icyorezo cyadutse mu ntangiriro z’umwaka wa 2020, nk’uko imibare itangazwa ibigaragaza.
Facebook Forum