Abayobozi bakuru ba Leta zunze Ubumwe z'Amerika baragirana ibiganiro kuri uyu wa Gatandatu n'abahagarariye ubutegetsi bw'Abatalibani muri Afuganistani. Ni ubwambere Amerika igiranye ibiganiro na bo kuva yakura ingabo zayo muri iki gihugu.
Byemejwe na ministeri y'ububanyi n'amahanga ya Leta zunze Ubumwe z'Amerika yatangaje ko itsinda ry'abayihagarariye rihurira i Doha muri Qatar n'abakuru b'abahagarariye ubutegetsi bw'Abatalibani kuri uyu wa gatandatu no ku cyumweru.
Ibiro ntaramakuru by'Abongereza Reuters byabanje gutangaza iby'ibi biganiro bwa mbere byavuze ko abahagarariye Amerika barimo abakozi ba ministeri y'ububanyi n'amahanga, ab'ishami rishinzwe iterambere mpuzamahanga n'abahagarariye inzego z'ubutasi.
Suhail Shaheen umuyobozi wagenwe n'ubutegetsi bw'Abatalibani kubuhagararira muri ONU yemereye Ijwi ry'Amerika ko abategetsi babo biteguye kubonana n'intumwa z'Amerika kuri uyu wa gatandatu n'ejo ku cyumweru.
Facebook Forum