Ambasaderi w'Ubutaliyani muri Repubulika ya Demokatasi ya Congo yishwe. Mu itangazo rigufi yashyize ahagaragara, minisiteri y'ububanyi n'amahanga y'Ubutaliyani ivuga ko ambasaderi Luca Attanasio yaguye mu gico cy'abantu bitwaje imbunda muri teritwari ya Nyiragongo, hafi y'umujyi wa Goma, umurwa mukuru w'intara ya Kivu ya ruguru, mu burasirazuba bwa Repubulika ya Demokarasi ya Congo.
Yari mu modoka yari kumwe n'izindi za PAM, ishami ry'Umuryango w'Abibumbye ryitwa ku biribwa, zagendaga zishoreranye (convoi mu Gifaransa). Yari ambasaderi i Kinshasa kuva mu 2017.
Uretse ambasaderi Attanasio, Ubutaliyani buvuga ko n'umusilikali wabwo umwe yaguye muri iki gico. Yari mu bashinzwe umutekano w'abari muri izi modoka. Umushoferi wari umutwaye nawe yishwe. Abakomerekeye mu gico bajyanywe mu bitaro bya ONU i Goma.
Ikigo ntaramakuru Reuters cyo mu Bwongereza kivuga ko iki gico cyari kigamije gushimuta ambasaderi w'Ubutaliyani. Mu mwaka 2018, Abongereza babiri bashimuswe n'abantu batazwi mu karere ambasaderi Attanasio yiciwemo.
Facebook Forum