Ba minisitiri b'ububanyi n'amahanga b'Uburusiya na Leta zunze ubumwe z'Amerika bagiranye inama i Geneve mu Busuwisi ku kibazo cya Ukraine. Antony Blinken na Sergei Lavrov bari baherekejwe n'intumwa zabo (abantu barindwi kuri buri ruhande). Baganiriye iminota 90 yonyine gusa muri imwe mu mahoteli akomeye y'i Geneve. Barangije inama, buri wese yaganiriye n'itangazamakuru ku ruhande rwe.
Minisitiri Lavrov yavuze ko "imishyikirano yari ikenewe kandi yabaye ingirakamaro." Yongeyeho ko "izakomeza mu gihe cya vuba." Yashimangiye ko Uburusiya budafite umugambi wo gutera Ukraine.
Blinken nawe yatangaje ko yabwiye mugenzi we ko Amerika izamurikira Uburusiya "ibisubizo byanditse mu cyumeru gitaha." Nyuma yabyo gato, bazongera bahure.
Ku birebana n'ibyo mugenzi we Lavrov avuga ko Uburusiya butazatera Ukraine, minisitiri Blinken yavuze ko Leta zunze ubumwe z'Amerika n'inshuti zayo "batabyemera na gato." Yasobanuye ko yari yinjiye mu nama azi neza ko nta myanzuro iri bufate. Ati: "Igikuru ni uko ubu, mu ntangiriro, noneho turi mu nzira yo gusobanukirwa ibyifuzo bya bamwe n'abandi."
Blinken yemeza ko Leta zunze ubumwe z'Amerika n'ibindi bihugu by'inshuti zayo badashobora kwemerera Uburusiya ibyo busaba.
Birimo ko impande zombi zigomba kugirana amasezerano yanditse ko umuryango w'ubutabarane w'ibihugu bituriye amajyaruguru y'inyanja y'Atlantika, OTAN utazigera wemera Ukraine nk'umunyamuryango wayo, no gukura ingabo n'intwaro zayo mu bihugu by'Ubulayi bw'uburasirazuba.
Naho Leta zunze ubumwe z'Amerika n'inshuti zayo basaba Uburusiya gukura ku mupaka wa Ukraine abasilikare babwo barenga 100,000 n'ibikoresho by'intambara bya rutura yahashyize.
Ni ubwa kane abayobozi batandukanye bo mu bihugu byombi bahuye imbonankubone ku kibazo cya Ukraine mu minsi icumi.
(VOA ifatanyije n'ibigo ntaramakuru AP na Reuters)
Facebook Forum