Nyuma y'umunsi umwe Abatalibani bigaruriye ibice bya Kabul, umurwa mukuru wa Afuganistani, kuri uyu wa mbere hari akaduruvayo ku kibuga cy'indege mpuzamahanga, Abanyafuganistani babarirwa mu bihumbi bashakisha uburyo bwo gusohoka mu gihugu.
Abasirikare b'Abanyamerika barashe amasasu y'imbuzi bagamije kubumbatira umutekano ku kibuga, mu gihe Amerika n'ibihugu by'Ubulayi bikomeje gucyura abaturage babyo no guhungisha Abanyafuganistani babafashaga mu kazi mu myaka 20 ishize.
Ubuyobozi bw'ikibuga cy'indege bwatangaje ko igice cy'icyo kibuga cyakira indege za gisivili gifunze kugeza igihe hazatangirwa irindi tangazo. Ku mbuga nkoranyambaga hagaragaye amashusho y'abantu benshi basibanira kwinjira mu ndege.
Amakompanyi y'indege anyuranye yatangaje ko ahagaritse ingendo zijya cyangwa zinyura mu kirere cya Afuganistani. Ubutaliyani, Arabiya Sawudite, Ubufaransa, Nouvelle Zelande, Ositiraliya na Repubulika ya Ceki biri mu bihugu byamaze gukura yo abaturage babyo.
Mu ijambo yavugiye i Doha muri Qatar ejo ku cyumweru, Mullah Abdul Ghani Baradar, umuyobozi mukuru wungirije uri no mu bashinze umutwe w'Abatalibani yavuze ko akeza Abanyafuganisitani n'ingabo z'aba Mujahideen cyangwa abarwanyi batagatifu, kuko bashoboye kwigarurira ahantu hanini mu gihe gito. Yakurikiranye ku buryo bw'amashusho abo barwanyi binjira mu biro by'umukuru w'igihugu ku munsi w'ejo.
Perezida Ashraf Ghani, Visi perezida we, n'abandi bategetsi bakuru ejo ku cyumweru barahunze. Yandika ku rukuta rwe rwa Facebook, Ashraf Ghani yavuze ko avuye mu gihugu mu rwego rwo kwirinda ko hameneka amaraso. Yanyuze muri Tajikistani ahava yerekeza ahandi hantu hataramenyekana.
Facebook Forum