Abanyaghana bazindukiye mw’itora rya perezida uyu munsi ku wa mbere. Ku biro by’amatora mu mpande zose z’igihugu, imirongo yari miremire mbere ya saa moya kw’isaha yo mu karere, ubwo ibyo biro byafunguraga imiryango.
Hari miliyoni zirenga 17 z’abantu biyandikishirije gutora uyu mwaka, n’ibiro by’amatora birenga 33 000. Harabarwa miliyoni zirenga ebyiri n’ibihumbi magana atandatu, bazaba batoye bwa mbere mu gihugu.
Barafata icyemezo cyo kugumana Perezida Nana Akufo- Addo cyangwa kugarura John Mahama wigeze kubabera perezida. Mu gihe ariko amaperereza yerekanye ko Perezida uri ku butegetsi, ashobora kuzabugumana, ishyaka rya Akufo-Addo byitezwe ko rizatakaza imyanya mu nteko ishinga amategeko.
Amaperereza yakozwe mbere muri Ghana n’ikigo gishinzwe guteza imbere demokarasi, yasanze abazatora bafite impungenge mu bijyanye n’ibikorwa remezo, ubushomeri n’uburezi.
Mu gihe hari abakandida 12, abari imbere bakomeye ni Perezida uri ku buyobozi, Akufo-Addo wo mw’ishyaka New Patriotic Party (NPP) n’uwahoze ari perezida John Mahama w’ishyaka National Democratic Congress (NDC).
Mbere y’itora, Mahama na Akufo-Addo basinye amasezerano y’igihango bemeza ko nta rugomo ku watsinda itora uwo ariwe wese. Mw’ijambo yavugiye kuri televisiyo y’igihugu, ejo ku cyumweru, Akufo-Addo yavuze ko isi yose uyu munsi ihanze amaso Ghana, kugira ngo irusheho gukomeza demokarasi isanzwe izwiho. Yahamagariye abaturage gutora mu cyo yise itora rizaba mu mahoro, mu mucyo kandi ridaheza.
Komisiyo y’amatora yavuze ko intego ari gukora ku buryo amajwi azaba yamenyekanye mu masaha 24, ibiro by’amatora bimaze gufunga imiryango.
Facebook Forum