Reta ya Amerika yatangaje ko yiteguriye gukorana na Republika ya Demokarasi ya Kongo mu gisata c’ubutare n’amabuye y’agaciro. Ubushikiranganji bujejwe imigenderanire y’Amerika n’ayandi makungu bwabitangaje ejo ku wa Mungu, buvuga ko Kongo ari yo yasavye Amerika gukorana na yo amasezerano, yotuma Amerika ishira imitahe mu butare n’amabuye y’agaciro vyayo, Amerika nayo igaca ifasha Kongo mu vy’umutekano.
Itororokanirizo ry’amakuru y’Abongereza, Reuters, Ijwi ry’Amerika dukesha ino nkuru, ritangaza ko Kongo ibicishije ku wuhuhagarariye inyungu zayo muri Amerika, imaze kurungikira amakete menshi umushikiranganji ajejwe imigenderanire y’Amerika n’ayandi makungu, Marco Rubio, n’abandi bategetsi ba Amerika, isaba ibijanye n’ano masezerano.
Urwandiko umuvugizi w’ubushikiranganji bujejwe imigenderanire y’Amerika n’ayandi makungu yarungikiye itororokanirizo ry’amakuru y’Abongereza, Reuters, rugira ruti: “ Amerika iriteguye gukorana ibiganiro bijanye n’iki gisata na Kongo, gihwanye n’umurongo ndetse n’icivugo ca Prezida Prezida Donald Trump, ashira inyungu za Amerika imbere ya vyose. Kongo ifise ubutare n’amabuye y’agaciro bikenewe mu gukora ibikoresho bitandukanye vyifashishwa mu vy’ubuhinga bwa none.”
Reuters ivuga ko mu ntango z’uku kwezi, umwe mu bategetsi mu biro vya prezida wa Kongo yakoze urugendo I Washington DC, aho yari yaje kuvugana n’abategetsi ba Amerika kuri ayo masezerano Kongo yipfuza kugira na Amerika.
Umwanditsi n’umwigisha w’Umunyamerika, Jason Stearns, yakoze ivyigwa bitandukanye kuri Kongo, asesangura, yavuze ko ata nkeka, ivyo Kongo isaba Amerika bizoshimisha Abayamerika benshi.
Jason Stearns yigisha kuri kaminuza “Simon Fraser” yo muri Kanada, yasiguye ko inganda zicukura ubutare n’amabuye y’agaciro muri Kongo, ziganjemwo izo mu Bushinwa. Yemeje ko Amerika ata ruganda na rumwe ifise rukorera muri ico gisata muri Kongo.
Ubutegetsi bwa Kongo ntaco buravugira ku mugaragaro ku vy’ano masezerano bwipfuza kugirana na Amerika.
Mu ndwi iheze ariko, Patrick Muyaya avugira reta ya Kongo, yavuze ko igihugu ciwe cipfuza kwagura abafatanyabikorwa muri ico gisata, asigura ko ibiganiro bijanye n’aya masezerano hagati ya Kongo na Amerika biba ku munsi ku munsi.
Muyaya yagize ati: “Abanyamitahe b’Abanyamerika bipfuza kuza muri Kongo, barahawe ikaze. Nta nkeka bazoronka aho bakorera. Kongo ifise ibibanza vyinshi vyo gukoreramwo, vyoba vyiza Abanyamerika bazanye imitahe yabo ngaha.”
Kongo ifise ubutare n’amabuye y’agaciro menshi. Mu butare buza imbere y’ubundi, harimwo cobalte, Litisyumu na Iraniyumu. ( Reuters)
Forum