Urwego rujejwe gucungera umutekano w’abategetsi batandukanye ba Amerika barimwo prezida, rwatangaje ko rwarashe umuntu rukeka ko ari icihebe.
Uwo mugabo yoba akomoka muri reta ya Indiana, yarasiwe mu micungararo y’ingoro ya prezida wa Amerika, White House, mu bucagucagu bw’uno wa Mungu, inyuma yo guhangana n’abajejwe umutekano.
Itangazo ry’urwego rucungera umutekano w’abategetsi ba Amerika (Secret Service), rivuga ko igipolisi gikorera mu micungararo ya White House, cabwiye abagize urwo rwego ko kibonye umuntu asa n’icihebe.
Abagize urwo rwego bariko begereza ahari umuduga wiwe, “ Yaciye asohora ikirwanisho ciwe, atangura kurasa, nabo baramusubiza.”
Uwo mugabo atatangajwe imyidondoro yiwe canke imyaka, yaciye ajanwa mu bitaro. Urwego rucungera abategetsi ba Amerika rwavuze ko batazi uko amerewe.
Uretse we yakomeretse, nta wundi yahakomerekeye. Igihe ukurasana kwaba, prezida wa Amerika Donald Trump yari muri reta ya Florida. Inzego zijejwe umutekano zatangaje ko zatanguye amatohoza ajanye n’ivyabaye (AP)
Forum