Mu kwezi kwa kane kw'uyu mwaka, Prezida wa Ukraine, Volodymir Zelensky, azogendera Afrika y'epfo mu biganiro n'abategetsi b'ico gihugu.
Prezida Zelensky azogirana ibiganiro na Prezida wa Afrika y’epfo, Cyril Ramaphosa, kw’itariki 10 y’ukwezi kwa kane.
Ni mu gihe Zelensky ariko agerageza kurondera gushigikirwa n’amakungu kurushiriza n’inyuma y’uko Reta ya Amerika ihagaritse imfashanyo zose za gisirikare zigenewe igihugu ciwe.
Umuvugizi wa Prezida wa Afrika y’epfo, Vincent Magwenya, yatangaje ko urugendo rwa Prezida Zelensky ruri mu twigoro tubandanya twa Prezida Cyril Ramaphosa two kuvugana na Prezida w’Uburusiya, Vladimir Putin na Prezida Zelensky ku mugambi uzotuma amahoro aboneka hagati y’ibihugu vyompi.
Afrika y’epfo iriko irondera kubonwa nk’igihugu kitagira aho cegamiye ku bijanye n’ingwano muri Ukraine. Yamara ifitaniye imigenderanare myiza n’Uburusiya.
Vyompi biri mw’ishirahamwe BRICS ry’ibihugu biriko biratera imbere mu butunzi. Ubindi bihugu biri muri iryo shirahamwe ni Ubushinwa, Ubuhindi, Burezile, n’ibindi. Biriko bigerageza guhangana n’ibihugu vyo mu burengero bw’isi mu vyerekeye ubutunzi. (REUTERS)
Forum