Abategetsi ba Koreya y’epfo bavuga ko abantu batari munsi ya 15 bakomeretse, ubwo indege z’intambara z’igihugu, kuri uyu wa kane zamanuriraga bombe ku mudugudu utuwe zitabigambiriye, mu gihe cy’imyitozo ya gisirikare.
Iyi myitozo yabaye mu rukerera rwo kuri uyu wa kane, yabereye ahitwa Seungjin hasanzwe hakorerwa imyitozo, mu bice bya Pocheon. Ni mu birometero 25 mu majyepfo y’umupaka wa Koreya ya Ruguru. Abayobozi muri minisiteri y’ingabo bavuze ko ibibombe bine bipima kilogarama 226 byaguye hanze y’ahagenewe gukorerwa imyitozo yo kurasa.
Amakuru atangazwa na Yonhap, ibiro ntaramakuru ya Koreya ya rugugu, avuga ko kiriziya n’andi mazu arindwi byangiritse. Biravugwa kandi ko hari hitezwe abandi bantu bakozweho n’ayo mabombe, mu gihe abaturage bakomeretse bakomeje gusaba ubuvuzi.
Uhagarariye abaturage b’i Pocheon, yabwiye ibiro ntaramakuru Yonhap ati: "Ikibazo cy’ibisasu byaguye mu gace karimo abasivili, kigaragaza neza amakosa akomeye y’imicungire y’imyitozo y’ingabo zirwanira mu kirere ndetse n’ibikorwa mu kurinda umutekano, ku buryo bitabuza ko ababishinzwe babiryozwa.”
Abayobozi mu gisirikare cya Koreya y’epfo, bavuze ko impanuka yaturutse ku kwibeshya mu guhuza ibikorwa, kandi ko imyitozo yo kuzimya umuriro hamwe n'ingabo z’Amerika, byabaye bihagaritswe mu gihe hagikorwa iperereza.
Iyi myitozo yari iya mbere y’abafatanyabikorwa muri uyu mwaka kandi yakozwe mu rwego rwo kwitegura imyitozo ngarukamwaka iteganyijwe. (VOA News)