Abategetsi bakomeye ba Reta Zunze Ubumwe za Amerika na Kanada, kuri uyu wa gatatu, baraganiriye ku bijanye n’ubudandaji.
Ivyo biganiro bibaye mu gihe Prezida wa Amerika, Donald Trump, yigijeyo mu kiringo c’ukwezi, ishirwa mu ngiro ry’amatagisi mashasha yo ku rugero rw’ibice 25 kw’ijana ku modoka zirungitswe muri Amerika zivuye, muri Kanada na Megisike.
Ubushikiranganji bujejwe imigenderanire bwa Amerika bwatangaje ko umushikiranganji wabwo, Marco Rubio n’uwa Kanada, Melanie Joly, baganiye ku bibazo biraje ishinga ibihugu vyompi, ivyerekeye umutekano ku mbibe bisangiye, ubudandaji hamwe n’iterambere rusangi.
Umushikirangaji ajejwe gutangaza amakuru mu biro vya prezida Amerika, Karoline Leavitt, yabwiye abamenyeshamakuru ko Prezida Trump yavuganye n’abategetsi bakomeye b’amasosiyete akora imodoka ya Ford, General Motor na Stellantis, imbere y’uko atangaza ko yigijeyo ingingo yerekeye ishirwa mu ngiro ry’amatagisi ku modoka zikorerwa muri Kanada na Megisike.
Yamara amatagisi mashasha ku bidandazwa biturutse muri ivyo bihugu bifitaniye imigenderanire ikomeye cane mu vyerekeye ubudandaji, azobandanya gushirwa mu ngiro ku bindi bidandazwa.
Umushikirangaji ajejwe gutanza amakuru mu biro kwa Prezida yavuze kandi ko Trump yiteguriye kuganira ku vyerekeye ibindi bidandazwa bishobora gukurwako amatagisi mashasha. (VOANEWS)