Prezida wa Reta Zunze Ubumwe za Amerika, Donald Trump, yatangaje ko umurwi wa Hamas uzokwibonerako niyo utarekura abanyayisirayeri wagize imbohe.
Umurwi wa Hamas Reta y'Amerika yashize ku rutonde rw’imirwi y’iterabwoba, wishuye uvuga ko kuba Prezida Trump yawugabishije ko uzokwibonerako niyo utarekura abanyayisrayeri wagize imbohe, bituma Israyeri iheba amasezerano yo guhagarika ingwano yagiranye nawo.
Ivyatangajwe n’umurwi Hamas bibaye umusi umwe inyuma y’uko Prezida Trump atangaje ko umurwi wa Hamas uzoriha vyinshi ni yo utarekura abo ukigize imbohe mu ntara ya Gaza.
Mu butumwa ku rubuga rwiwe, Truth Social, Prezida Trump yasavye umurwi Hamas kurekura bidatevye abantu bose ukigize imbohe n’ibiziga vy’abo wagandaguye ngo canke ivyawo bizoba birangiye.
Trump yavuze ko ariko arungikira Israyeri ivyo ikeneye vyose kugira irangize akazi kayo. Yatangaje ko ata munywanyi n’umwe w’umurwi Hamas azokwumva atekaniwe niyo uwo murwi utakora ivyo asaba.
Ibiro vya Prezida wa Amerika, kuri uyu wa gatatu, vyatangaje ko abategetsi ba Amerika bavuganye n’umurwi Hamas. Vyamenyesheje ko ibiganiro vyashikiye ku vyerekeye kurekura Abanyamerika uwo murwi ukigize imbohe mu ntara ya Gaza. (VOANEWS)
Forum