Ishirahamwe mpuzamakungu, ONU, rirashigikiye umugambi w'ibihugu vy'Abarabu wo gusubira kwubaka ivyasambuwe n'ingwano mu ntara ya Gaza.
Igihugu ca Misiri ni co cafashe iya mbere ku vyerekeye uwo mugambi gikoranye na Palestina. Uwo mugambi washikirijwe icese muri iki gihe n’ishirahamwe ry’ibihugu vy’Abarabu, uriyamiriza ikurwa iryo ari ryo ryose ku nguvu ry’Abanyapalestina mu ntara ya Gaza.
Umunyamabanga mukuru w’ishirahamwe ry’ibihugu vy’Abarabu, Ahmed Aboul Gheit, yashimikiye ku kamaro k’umugambi, ibihugu vy’Abarabu vyashikirije.Yatangaje ko werekana ubundi buryo burashe kandi butandukanye n’umugambi ugenewe gukura Abanyapalestina mu ntara ya Gaza.
Umugambi w’ishirahamwe ry’ibihugu vy’Abarabu wateguwe n’igihugu ca Misiri, gikoranye na Palestina. Inyuma y’uko wemejwe n’inama y’ishirahamwe ry’ibihugu vy’Abarabu, wabaye umugambi wemejwe n’ibihugu vyose vy’Abarabu.
Uwo mugambi urimwo gukuraho ibisigarira vy’ivyasambuwe n’ingwano, gutunganya uburyo bwo gufasha abanyagihugu gusubira gukora no kuronka infashanyo y’amakungu iciye mu kigega kigenzurwa n’Ibanki y’Isi yose.
Uwo mugambi urashikiriza ivyerekeye iterambere ry’ibisagara mu kiringo kirekire kiri imbere. Igihugu ca Misiri, kizokwakira ikoraniro mpuzamakungu kibifashijwemwo n’ishirahamwe mpuzamakungu ONU, mu ntumbero yo gukwirikirana imfashanyo y’amakungu.
Yamara Reta Zunze Ubumwe za Amerika na Israyeri vyiyamirije umugambi washikirijwe n’ibihugu vy’Abarabu wotuma Abanyapalestina imiliyoni zibiri n’ibihumbi ijana baba mu ntara ya Gaza, bahaguma.
Umugambi wa prezida wa Amerika, Donald Trump, ni uko Amerika ifata intara ya Gaza, Abanyapalestina bahaba bakajanwa kuba mu bindi bihugu, ubutagisubira inyuma. Amerika na Israyeri vyavuze ko umugambi w’ibihugu vy’Abarabu udafatira ku kugene ibintu vyifashe muri iki gihe mu ntara ya Gaza. (AFP)
Forum