Urubanza rw’abantu benshi batavuga rumwe n’ubutegetsi bwa Tuniziya rwatangiye kuri uyu wa kabiri. Bashinjwa ibyaha by’umutekano w’igihugu.
Imiryango iharanira uburenganzira bwa muntu yamagana uru rubanza ivuga ko rushingiye kuri kuri politiki.
Abaregwa bagera kuri 40 bazwi cyane barimo abahoze ari abadipolomate, abanyapolitiki, abanyamategeko ndetse n’abanyamakuru. Bamwe muri bo banengeye cyane ku mugaragaro Perezida Kais Saied.
Amakuru avuga ko abari basanzwe bafunzwe batemerewe kujya mu rukiko kandi ko bahawe uburyo bwo kurukurikira kw’ikoranabuhanga.
Mu byaha baregwa muri uru rubanza harimo "gucura umugambi wo guhungabanya umutekano w’igihugu" no "kuba mu mutwe w’iterabwoba". Ni ibyaha bishobora guhanishwa ibihano bikomeye bikaba byanagera ku gihano cy’urupfu.
Abunganira abaregwa babwiye ibitangazamakuru ko “nta kimenyetso gihari” gihamya umugambi wo guhungabanya umutekano w’igihugu. (AFP)
Forum