Umushikiranganji wa mbere w’Ubwongereza, Keir Starmer ahamagarira abategetsi bo ku mugabane wa Buraya kugwiza no gukomeza inguvu za gisikare mu bihugu vyabo, mu ntumbero yo gutuma amahoro agaruka muri Ukraine, umutekano w’umugabane wa Buraya nawo ugakingirwa cane.
Keir Starmer yabivugiye mu nama yakoresheje, mu ntumbero yo kwerekana ko Ubwongereza bushigikiye Ukraine na Prezida wayo, Volodymyr Zelensky.
Ubwongereza bwatunganije iyo nama yabereye I Londres inyuma y’uguterana amajambo kwabaye hagati ya Prezida wa Amerika Donald Trump, n’uwa Ukraine Zelensky, ku munsi wa gatanu, igihe abo bategetsi bahurira mu ngoro ya prezida wa Amerika I Washington DC.
Umushikiranganji wa mbere w’Ubwongereza, yavuze ko ku ncuro ya mbere, abategetsi ba Buraya basanze vyari ngombwa ko bahura kugira bavugane ku kibazo “ batari bwahure naco muri kino kinjana.”
Prezida wa Ukraine yagiye mu Bwongereza, aciriye hagati urugendo rwiwe rwo muri Amerika inyuma y’uko guterana amajambo kwabaye hagati yawe na Prezida Trump, hamwe na visi prezida wa Amerika, JD Vance.
I Londres mu Bwongereza, Prezida Zelenskiy, yakiranywe igishika n’abategetsi batandukanye b’I Buraya, aho baza baramuhobera, bamubwira ko bamushigikiye.
Umushikiranganji wa mbere w’Ubwongereza Starmer yavuze ko mu ntumbero yo guha icizere c’amahoro Ukraine, yakoranye kandi ibiganiro na Prezida wa Amerika Donald Trump, uw’Ubufaransa Emmanuel Macron hamwe n’uwa Ukraine.
Muri ivyo biganiro abo bategetsi bemeranije ko hagiye gushirwaho umugwi ugizwe n’abava mu bihugu ba Buraya, uzorimbura ingingo zotuma amahoro agaruka muri Ukraine.
Uwo mugwi umaze gutunganya izo ngingo, uzoheza uzishikirize Amerika .Abategetsi b’Ubwongereza n’Ubufaransa bavuga ko bagiye kandi kwumvisha Amerika, ko Uburusiya budashobora kwemera amasezerano y’amahoro adashigikiwe na Amerika.
Hagati aho, umuhanuzi mukuru mu vy’umutekano mu biro vya prezida wa Amerika, Mike Waltz yabwiye tereviziyo Nyamerika CNN, ko Amerika yipfuza indongozi ya Ukraine yotuma haboneka amasezerano y’amahoro arama hagati ya Ukraine n’Uburusiya, ariko ko bitaboneka neza niba Zelensky yiteguriye gufata iyo nzira.
Bamwe mu bategetsi ba Buraya barimwo umunyamabanga mukuru w’ishirahamwe ryo kwivunira abansi hamwe OTAN, bavuze ko inyuma yo guterana amajambo kwabaye hagati y’indongozi za Amerika na Ukraine, bashigikiye Ukraine, kandi bazotera intege Prezida Zelensky akongera gukorana ibindi biganiro na Prezida Trump. Bavuze ko bipfuza gusukamwo mabisi hagati y’ubutegetsi bwa Amerika na Ukraine.
Forum