Isirayeri yafashe ingingo yo kuzibira imfashanyo n’ibindi vya nkenerwa vyose vyinjira muri Gaza. Ivuga ko ari ingingo yafashe mu ntumbero yo kwotsa igitutu umurwi wa Hamas kugira wemere ko amasezerano y’agahengwe k’intambara, yasabwe na Amerika yinjira mu gice cayo ca kabiri.
Igice ca mbere c’ayo masezerano cari kirimwo ingingo zitegeka korohereza abagira neza gushikana imfanyo ku bazikeneye mu ntara ya Gaza caheze ejo ku wa gatandatu.
Vyari bitegekanijwe ko Isirayeri na Hamas baca batangura ibiganiro vyo kumvikana ku gice ca kabiri c’ayo masezerano yategekanya agahengwe k’igihe kirere kire. Ni igice cari gutangura ari uko Hamas irekuye igice c’abo igifise nk’imbohe z’intambara.
Umutegetsi wa Isirayeri atashimye ko amazina yiwe atangazwa, yavuze ko ingingo yo kuzibira imfashanyo zija muri Gaza, Isirayeri yayifashe ivyumvikanyeko na Amerika. Reta ya Amerika yajmara ntaco irabivugako.
Ku ruhande rwa Hamas, indongozi z’uwo murwi zavuze ko ingingo ya Isirayeri “ Ari igikangisho kinyuranye n’amategeko, ije guhonyanga no kubangamira amasezerano yo gushira ibirwanisho hasi, kandi yikwije kugira ifatwe nk’icaha co mu ntambara.”
Biri uko mu gihe Isirayeri yagabishije ko Hamas yanse kwemera ko amasezerano ahasanzwe yongerwako ikiringo, ingaruka zizoba nyinshi. (AP)
Forum