Igisirikare ca Uganda uno munsi ku wa Mungu catangaje ko carungitse abandi basirikare baco muri Kongo, mu bikorwa vyo “ gutuza imirwi yitwaje ibirwanisho iri mu bice bitandukanye vya Kongo.”
Abasirikare Uganda yarungitse yavuze ko bagiye mu gisagara citwa Mahagi, kiri mu buraruko bushira ubuseruko bwa Kongo. Felix Kulayigye avugira igisirikare ca Uganda, yabitangarije itororokanirizo ry’amakuru y’Abafaransa, AFP, avuga ko “ Abasirikare ba Uganda bamaze kwinjira I Mahagi, kandi ari bo bagenzura ico gisagara.” Igisagara ca Mahagi kiri mu ntara ya Ituri ihana urubibe na Uganda.
Uwo mutegetsi wa Uganda, avuga ko Reta ya Kongo ari yo yasavye Uganda kuyiha abasirikare bafasha mu gukinngira umutekano, inyuma yaho igenekerezo rya 10 z’ukwezi kwa kabiri, abarwanyi ba CODECO bagandaguriye abasivire 51 bo muri ico gisagara . Nta makuru yandi ajanye n’iki gikorwa Felix Kulayigye avugira igisirikare ca Uganda yatanze.
Abarwanyi bo mu murwi wa CODECO bavuga ko bwaranira inyungu z’abo mu bwoko bw’aba Lendu barwiriyemwo abarimyi, bemeza ko babangamiwe n’abo mu bwoko bw’aba Hema barwiriyemwo aborozi.
Muri Kongo, Uganda yari isanzwe ihafise izindi ngabo ziharurwa mu bihumbi. Zagiyeyo biciye mu masezerano yasinywe n’ivyo bihugu 2. Uganda ivuga ko ifise amakenga ko intambara iri muri Kongo ishobora gukwiragira mu bindi bice vyegeranye n’ico gihugu.
Mu gihe muri Kongo hasanzweyo ingabo z’ibindi bihugu, zirimwo iz’Uburundi n’iz’u Rwanda, abahinga bavuga ko bishobora gukwega intambara ikaze nk’iyabaye muri kongo mu myaka ya 1998-2003, aho ibihugu vyinshi vya Afurika vyari muri Kongo.
Abahitanywe n’iyo ntambara ico gihe, baharuwe mu ma miriyoni, ingaruka zirimwo ibiza na kigoyi, zisonga abayirokotse. (AFP)
Forum